partekatu
• AROA PROZESUA
Lasarte-Oriak AROA jarri du abian, euskara biziberritzeko eta euskal komunitatea ahalduntzeko prozesu estrategikoa
Estrategia parte-hartzailea da, udalerriko euskararen egoera diagnostikatzea eta herritarrekin batera etorkizuna markatuko duten ekintzak definitzea helburu duena.
Lasarte-Oriako Udalak AROA prozesuaren hasiera aurkeztu du prentsaurrekoan, udalerrian euskara indartzea eta, herritarrekin batera, datozen urteetan jarraitu beharreko bidea definitzea helburu duen esparru estrategikoa.
Bertan izan dira Agustin Valdivia alkatea, Estitxu Alkorta lehen alkateordea eta Euskara zinegotzia, eta Enara Eizagirre, prozesua dinamizatzeaz arduratu den Aztiker enpresako teknikaria.
Agustin Valdivia alkateak azpimarratu duenez, «Lasarte-Oriak, AROA prozesuaren bidez, bide berri bat hasi nahi du euskara biziberritzeko eta hitz egiten dugunok ahalduntzeko. Azken urteetan urrats handiak egin ditugu, baina errealitate linguistikoa dinamikoa eta aldakorra da, eta horregatik behar dugu ikuspegi berritua. AROA ez da soilik udal ekimen bat izango: herritarren eta herriko eragileen parte hartze aktiboa ezinbestekoa izango da».
Estitxu Alkorta Euskara zinegotziak, bere aldetik, gogorarazi du udalerriak dagoeneko garatu dituela aurretiazko planak, hala nola Euskara Biziberritzeko Plan Nagusia (EBPN) edo Euskara Sustatzeko Ekintza Plana (ESEP), baina orain beharrezkoa dela «estrategia eguneratzea. Helburua da egoeraren gaur egungo diagnostikoa izatea, aukerak eta erronkak identifikatzea, eta ekintza zehatzak adostea euskarak aurrera egin dezan herriko bizitzako esparru guztietan».
Prozesuak bi fase izango dituela azaldu du Aztikerretik Enara Eizagirrek: «Lehenengoan Lasarte-Oriako euskararen egoeraren diagnostikoa egingo dugu, datuak aztertuz, aurreko planak berrikusiz eta inkesta eta elkarrizketen bidez herritarren eta tokiko eragileen iritziak jasoz. Bigarren fasean, diagnostiko horretatik abiatuta, AROA diseinatuko dugu: helburuak, ardatz estrategikoak, ekintzak eta jarraipen-mekanismoak. Hori guztia azarotik urtarrilera bitartean hiru saio irekitan bilduko den talde motor batekin elkarlanean».
Prozesua 2025eko urritik 2026ko udaberrira bitartean garatuko da, eta herritarren parte-hartzea eta genero-ikuspegia izango ditu ardatz, emakumeen eta gizonen ahotsa berdin ordezkatuta egotea bermatuz.
Diagnostiko faseari ekiteko, Udalak datozen egunetan online inkesta bat jarriko du herritarren eskura, udal kanalen eta tokiko hedabideen bitartez zabalduko dena. Bertan, euskararen egoeraz iritzia eman eta etorkizunerako proposamenak egiteko aukera izango da.
Alkateak herritarrak inplikatzera gonbidatuz amaitu du: «Proiektu kolektibo bat da hau. Euskararen etorkizuna Lasarte-Orian guztion artean marraztu behar dugu. Herritarrak prozesu honetan aktiboki parte hartzera animatzen ditut, gure hizkuntza eta gure herria indartzeko gakoa izango baita».
Argazkia eta informazioa: Lasarte-Oriako Udala
