partekatu
• BARATZE EKOLOGIKOAK
Plazaolako landa-parkeko baratze ekologikoen 79 partzeletako bat eskatzeko epea ireki da
Laborantza ekologikoa, jasangarritasuna eta herritarren parte-hartzea sustatzen dituen deialdia aurkeztu du Agustín Valdivia alkateak.
Lasarte-Oriako alkate Agustín Valdiviak Plazaolako landa-parkean dauden udal baratze ekologikoak esleitzeko deialdi berria aurkeztu du prentsaurrekoan. Jasangarritasuna, ingurumen-prestakuntza eta parte-hartze soziala uztartzen dituen proiektua da, eta herritarrei aukera ematen die familia-autokontsumorako laborantza ekologikorako lursailak eskuratzeko.
“Baratze ekologikoen programa Udalak ingurumenaren aldeko kontzientziazioa, inguruarekiko errespetua eta lurzorua edo ura bezalako baliabideen kudeaketa arduratsua sustatzeko egiten duen apustu sendoa da”, adierazi du alkateak, eta gogorarazi du proiektu hau trantsizio ekologikorako eta herritarren parte-hartzerako udal-estrategiaren barruan kokatzen dela.
Plazaolako baratze-parkeak 79 lursail ditu, horietatik 77k 30 eta 40 m² artean dituzte, eta 5 m²-ko 2 baratze altu mugikortasun urriko pertsonentzat erreserbatuta daude. Gune komunak ere baditu, hala nola, konposta egiteko guneak, bideak, ureztatzeko putzuak eta zerbitzu-eraikinak.
Parte hartzeko baldintzak
Partzela horietako bat eskuratu ahal izango dute gutxienez esleipena baino hiru urte lehenagotik Lasarte-Orian erroldatuta dauden eta bertan bizi diren pertsonek, laborantzarako lur egokirik ez badute jabetzan, errentamenduan edo usufruktuan, eta beste baratze ekologiko baten erabiltzaile ez badira, besteak beste.
Lizentziek urtebeteko iraupena izango dute, gehienez lau urtera arte luzatu ahal izango direnak, eta 2025eko irailaren 23an Gipuzkoako Aldizkari Ofizialean argitaratutako udal ordenantzak arautuko ditu.
Urteko erabilera-tasa 10 eurokoa izango da baratze-plazetarako, eta 75 eurokoa baratze-lursailetarako. Langabezian dauden esleipendunek % 50eko hobaria izango dute.
Gainera, 100 euroko fidantza ordaindu beharko da, eta lagapen-aldia amaitutakoan itzuliko da, betiere lizentzian ezarritako baldintzak betetzen badira.
Izen-ematea eta esleipena
Izena emateko epea deialdia ofizialki argitaratu eta hurrengo egunean irekiko da, eta 2025eko urriaren 15era arte egongo da zabalik. Eskabideak Udalaren web orrian dagoen inprimaki ofiziala erabiliz aurkeztu behar dira, eskatzen diren egiaztagiriekin batera.
Eskaerak egiaztatu ondoren, onartu eta baztertuen behin-behineko zerrenda argitaratuko da, erreklamazioak egiteko 10 eguneko epearekin. Erabakia hartu ondoren, zozketa publikoa eginen da lurzatiak esleitzeko. Eguna, ordua eta tokia aldez aurretik iragarriko dira.
“Baratze horiek elikagaiak ekoizteko ez ezik, elkarbizitzarako eta ikasketarako gune ere izatea nahi dugu, ingurunearekiko konpromisoa eta bizilagun erabiltzaileen parte-hartzea lantzeko”, amaitu du Agustín Valdiviak.
Prozesuari eta dokumentazioari buruzko informazio guztia Udalaren iragarki-oholean eta udalaren webgunean www.lasarte-oria.eus kontsulta daiteke.
Argazkia eta informazioa: Lasarte-Oriako Udala
