partekatu
• ATERPEAREKIKO HITZARMENA
Sheila Benítez, ATERPEAko “1.000 euro lortu!” kanpainaren irabazlea
Zortedunak Udalaren eta ATERPEA Elkartearen laguntza izan du hiru ordutan herriko dendetan erosketak egiteko.
ATERPEA Merkatari, Ostalari eta Zerbitzuen Elkarteak Lasarte-Oriako Udalaren laguntzaz antolatutako “Lortu 1.000 euro!” kanpainaren irabazlearen izena Okendo plazan eman zen ezagutzera joan den ostiralean, uztailak 18. Aurtengo protagonista Sheila Benítez izan da, antolakuntzak 1.000 euroko saria eman baitio, hiru ordutan, atxikitako saltokietan gastatzeko.
Ekitaldian Agustin Valdivia alkateak, Nuria Fernandez Sozio-Ekonomia zinegotziak, Mabel Pedreira ATERPEAko lehendakariak eta elkarteko hainbat kidek hartu zuten parte, Sheilarekin batera bertako establezimenduetan erosketak egiteko jardunaldi honetan.
Lasarte-Orian udako klasiko bihurtu den kanpaina honen helburua, kontsumitzaileen fideltasuna sarituz, tokiko saltoki txikietan kontsumoa sustatzea da. Sheila Benítez 17:00etatik 20:00etara ibili zen herriko negozioetan, antolatzaileek emandako ibilgailu batean, eta ATERPEAko langileek lagunduta, erosketetan aholku eman baitiote.
Saria emateko ekitaldian, Mabel Pedreirak ekimen honek herritarren aldetik izan duen harrera ona nabarmendu du: “Ilusioa pizten duen kanpaina da, merkataritza dinamizatzen duena eta gure establezimenduek eskaini behar duten guztiari balioa ematen diona”.
Nuria Fernandez zinegotziak elkartea zoriondu du merkataritza dinamizatzeko ekintza hauek bizirik mantentzeagatik: “Hemen erosteak gure inguruan aberastasuna sortzeaz gain, udalerriko gizarte kohesioa indartzen du”.
Agustin Valdivia alkateak, bere aldetik, eskerrak eman nahi izan dizkio ATERPEAri bere konpromisoagatik: “1.000 euroen kanpaina Lasarte-Oriako jai eta merkataritza egutegiaren parte da jada, eta merkataritzaren bidez ere herria nola egin dezakegun erakusteko adibide bikaina da”.
Argazkia eta informazioa: Lasarte-Oriako Udala
