partekatu
• SAN PEDRO JAIAK
Udalak zapiak eta banderolak banatuko ditu jai askeak, errespetuzkoak eta seguruak aldarrikatzeko
Kanpaina honek, guztiontzako jaien aldeko konpromisoa erakustera bultzatzen ditu herritarrak.
San Pedro jaiak jada ate-joka daude, eta Udalak mezu argia zabaldu nahi du ospakizuna hasi aurretik: jaiak herritar guztienak dira, eta askatasun, errespetu eta bizikidetza giroan gozatu behar dira.
Helburu horrekin, Berdintasun sailak zapiak eta banderolak banatuko ditu “Lasarte-Oria gurea da! Jaiak gureak dira!” leloarekin, azken urteotan jaien irudi ezagun bihurtu den esaldia, kale, balkoi eta jai guneetan berriro ere presente egongo dena.
Elementu fisikoez harago, ideia xume baina garrantzitsu bat indartu nahi du ekimenak: pertsona guztiek dute eskubidea festez berdintasunean gozatzeko, seguru sentitzeko eta aisialdia beldurrik gabe bizitzeko.
Kanpainak bereziki azpimarratzen du emakumeek eta sexu-genero disidentziek espazio publikoa askatasunez okupatzeko duten eskubidea, jaietako bizitzan erabat parte hartzeko duten eskubidea eta edozein indarkeria- edo diskriminazio-egoeraren aurrean komunitatearen babesa izateko duten eskubidea.
Zapiak eta banderatxoak jaso nahi dituztenek honako leku eta ordutegi hauetan jaso ahal izango dituzte:
- Lasarte-Oriako Emakumeen Etxea (Donostia Etorbidea, 6)
- ekainaren 8a, 11:00etatik 16:00etara.
- ekainaren 9an, 11:00etatik 16:00etara.
- ekainaren 25ean, 09:00etatik 14:00etara.
- Okendo plaza
- ekainaren 26ean, 09:30etik 11:45era.
Ekintza honen bidez, Udalak mezu partekatu batekin bat egitera gonbidatzen ditu herritarrak: jaiak topagune, alaitasun eta elkarbizitzarako gune bat izan daitezela, non pertsona guztiek lasaitasunez eta berdintasunez gozatu ahal izango duten.
